Evrópumeistarar SC Magdeburg leika til úrslita við Füchse Berlin á heimsmeistaramóti félagsliða í handknattleik karla í Dammam í Sádi Arabíu á morgun. Magdeburg lagði Barlinek Industria Kielce, 28:24, í undanúrslitaleik í dag.
Füchse Berlin, sem vann Evrópudeildina í vor, hafði betur á móti Barcelona, 35:34, í hörkuleik í dag. Framlengja varð til að knýja fram hrein úrslit.
Haukur Þrastarson kom ekkert við sögu hjá Barlinek Industria Kielce í viðureigninni við Magdeburg. Ómar Ingi skoraði sex mörk fyrir Evrópumeistarana og Janus Daði Smárason þrjú auk þriggja stoðsendinga. Ómar skoraði eitt marka sinna úr vítakasti og átti til viðbótar tvær stoðsendingar. Hann lék með í 54 mínútur en Janus Daði í tæpar 27 mínútur.
Daninn Mathias Gidsel skoraði 10 mörk fyrir Füchse Berlin og átti einnig þrjár stoðsendingar. Sænski hornamaðurinn Jerry Tollbring skoraði sex mörk. Luis Frande og Timothey N’Guessan skoruðu sex mörk hvor fyrir Barcelona.
Mikil dramatík var í lok venjulegs leiktíma eins og sjá má á myndskeiðinu hér fyrir neðan.
A drama-packed ending of regular time in the 2023 IHF Men's #SuperGlobe semi-final between 🇪🇸 Barça and 🇩🇪 @FuechseBerlin 🔥 A narrow miss, an incorrectly called time-out, a penalty — and the biggest saves of Lasse Ludwig's life leading to extra time 🤯 pic.twitter.com/nS9CsAtij4
— International Handball Federation (@ihf_info) November 11, 2023
