„Við þurfum fyrst og fremst að ná fram góðum leik, kalla fram okkar einkenni, fá hraðaupphlaup og leika af skynsemi í sókninni. Fyrst og fremst þurfum við að einbeita okkur að því að vinna þá hér heima,“ segir Óskar Bjarni Óskarsson þjálfari Vals um leikinn við rúmenska liðið CS Minaur Baia Mare í undanúrslitum Evrópubikarkeppninnar í handknattleik sem fram fer á Hlíðarenda í kvöld og hefst klukkan 19.30.
„Við þurfum að vinna heimaleikinn og sjáum svo til hvernig leikurinn þróast,“ segir Óskar Bjarni sem varar við að menn fari framúr sér í vangaveltunum. Framhaldið geti ráðist af úrslitum leiksins í kvöld.
CS Minaur Baia Mare er í þriðja sæti rúmensku deildarinnar. Að sögn Óskars Bjarna er liðið mun betur samæft en Steaua Búkarest sem Valur lagði í átta liða úrslitum Evrópubikarkeppninnar fyrir um þremur vikum samanlagt með sjö marka mun í tveimur viðureignum.
Miðasala á Stubb.is – smellið hér.
Horfa og hlusta má á viðtal við Óskar Bjarna í myndskeiði efst í fréttinni.
