Fjölnir er kominn yfir í rimmunni við Þór Akureyri í undanúrslitum umspilsins um sæti í Olísdeild karla í handknattleik eftir að hafa unnið með fjögurra marka mun, 28:24, í fyrstu viðureign liðanna í Dalhúsum í dag. Liðin mætast öðru sinni í Höllinni á Akureyri á sunnudaginn klukkan 16. Liðið sem fyrr nær tveimur vinningum mætir sigurliðinu úr einvígi ÍR-inga og Kórdrengja.
Jafnt var að loknum fyrri hálfleik í Dalhúsum í dag, 13:13, eftir að leikmenn Fjölnis höfðu farið illa að ráði sínu á lokamínútum hálfleiksins.
Strax í upphafi síðari hálfleiks sigldu heimamenn fram úr. Þeir voru um skeið fimm mörkum yfir, 21:16, þegar hálfleikurinn var tæplega hálfnaður. Eftir það var sigurinn aldrei í stórhættu hjá Fjölnismönnum.
Björgvin Páll Rúnarsson lék afar vel fyrir Fjölnisliðið í leiknum eftir því sem næst verður komist en tíðindamaður handbolta.is horfði holt og bolt á leikinn í rútuferð í Serbíu.
Mörk Fjölnis: Björgvin Páll Rúnarsson 8, Brynjar Óli Kristjánsson 4, Óðinn Freyr Heiðmarsson 4, Þorleifur Rafn Aðalsteinsson 4, Aðalsteinn Örn Aðalsteinsson 3, Elvar Otri Hjálmarsson 2, Viktor Máni Matthíasson 2, Viktor Berg Grétarsson 1.
Mörk Þórs Ak.: Josip Kezic 9, Tomislav Jagurinovski 6, Jóhann Einarsson 4, Heimir Pálsson 3, Viktor Jörvar Kristjánsson 1, Viðar Ernir Reimarsson 1.
Flautað verður til fyrsta leiks ÍR og Kórdrengja klukkan 19.30 í Austurbergi.
