Hjörtur Ingi Halldórsson fór á kostum í dag þegar hann skoraði 11 mörk í 14 skotum fyrir HK þegar Kópavogsliðið kjöldró ungmennalið Vals með 17 marka mun, 38:21, í Kórnum í Grill 66-deild karla í handknattleik í dag. Aðeins munaði tveimur mörkum á liðunum í hálfleik, 16:14.
Einstefna var hinsvegar í síðari hálfleik af hálfu HK-manna sem ætla að gera sig gildandi í toppbaráttu deildinnar. Sigurjón Guðmundsson, markvörður HK, fór hamförum og varði 21 skot og var með 50% hlutfallsmarkvörslu.
Elías Már Halldórsson þjálfari HK tefldi fram ungum og uppöldum leikmönnum í leiknum. Þeir svöruðu svo sannarlega kalli þjálfarans og virtist það falla vel í kramið hjá stuðningsmönnum HK.
Virkilega flott hjá mínum mönnum í handboltanum hjá HK keyra á uppöldum sem unnu Val U með 17 mörkum, #handbolti
— Ómar Stefánsson (@OmarStef) January 30, 2021
HK situr nú í fjórða til fimmta sæti deildarinnar ásamt Kríu með átta stig.
Mörk HK: Hjörtur Ingi Halldórsson 11, Símon Michael Guðjónsson 4, Kristján Ottí Hjálmsson 4, Kristján Pétur Barðason 4, Einar Bragi Aðalsteinsson 4, Sigurður Jefferson Guarion 2, Kári Tómas Hauksson 2, Pálmi Fannar Sigurðsson 1, Sigurvin Jarl Ármannsson 1, Davíð Elí Heimisson 1, Einar Pétur Pétursson 1.
Varin skot: Sigurjón Guðmundsson 21 skot, 50%.
Mörk Vals: Benedikt Gunnar Óskarsson 4, Róbert Nökkvi Petersen 4, Óðinn Ágústsson 3, Einar Þorsteinn Ólafsson 3, Tómas Sigurðarson 3, Erlendur Guðmundsson 2, Breki Hrafn Valdimarsson 1, Þorgeir Arnarsson 1.
Varin skot: Martin Nágy 10 skot, 20,8%.
Staðan í Grill 66-deild karla.
