Ída Margrét Stefánsdóttir, unglingalandsliðskona, lék á als oddi með ungmennaliði Vals í kvöld þegar það vann ÍR, 23:21, í hörkuleik í 1. umferð Grill66-deildar kvenna í Origohöllini. Ída Margrét skoraði 10 af mörkum Valsliðsins sem var tveimur mörkum yfir í hálfleik, 14:12.
Leikurinn var bráðskemmtilegur, jafn og spennandi. ÍR-liðið er reynslunni ríkara eftir að hafa komist í umspil um sæti í Olísdeildinni í vor. Það þykir vera eitt þeirra liða sem ætlar að gera atlögu að sæti í Olísdeildinni undir stjórn Jakobs Lárussonar sem stýrði kvennaliði FH með góðum árangri um árabil.
Mörk Vals: Ída Margrét Stefánsdóttir 10, Auður Ester Gestsdóttir 5, Sunna Thoroddsen Friðriksdóttir 2, Hildur Sigurðardóttir 2, Mariam Eradze 2, Berglind Gunnarsdóttir 1, Vaka Sigríður Ingólfsdóttir 1.
Mörk ÍR: Ksanija Dzaferovic 7, Hildur Leifsdóttir 6, Hildur María Leifsdóttir 3, Auður Pálsdóttir 1, Dagbjört Ýr Ólafsdóttir 1, Guðrún Mariam Rayadh 1, Matthildur Jónsdóttir 1, Stefanía Ósk Hafberg 1.
